BIEBEL IN DE TWENTSE SPROAKE -OALE TESTAMENT / 4

Oawerzat oet 't Hebreeuws deur Dr. Anne van der Meiden met hölp van ne begeleidingsgroep. In november 2004 is ’t derde deel van ’t Oale Testament in de Twentse Sproake oetkömmen. Biej ’t anbeden van ’t book wörden der too zegd, dat dit dan veurlopig ’t leste deel wörden zol en dat ’t nog nich dudelijk was of en hoo de rest van de beuke van ’t Oale Testament nog ’n moal in ’t Twents verschienen zollen. Al in 2005 wörden ’t dudelijk dat de condities veur de verschiening van ’t veerde (en leste) deel van ’t Oale Testament onverwochens better wörden. ’n Vertaler kon met zien weark verdan goan en ’n oetgeaver wol ’t karwei, woar zien vaar in 1994 an begunnen was, geern ofmaken. Datzölfde meenden ok de leden van de begeleidingsgroep en gungen met eer weark moonter verdan.
En zo is ’t dan meugelijk wörden dat wiej dit dikke veerde deel an de trouwe leazers veurleggen könt. ’t Deel gef nich de biebelbeuke dee de meeste andacht hebt van de biebelleazers, meer ’t geet der um, dat der now nen kepleten biebel in ’t Twents op toafel lig.
Met dit deel is de tekst van ’n canonieken biebel heelmoal vertaald en as der leu bint dee zich an de vertaling van de deutero-canonieke beuke woagen weelt, dan zal de redaktie eer geern roaden.
In dit deel stoat nich bloots de beuke dee an ’t geheel nog mankeerden, meer ok dree anvullingen op Exodus, Jozua en Daniël, dee in de delen 1 en 3 nich opnömmen warren.
Hier en doar bint wat verbetteringen in de spelling toopast, meer dat wil nich zeggen dat wiej de nieje spellingsveurschriften van ’t Twents, dee in ’t noajoar van 2007 publiceerd wordt, now al vus toopast hebt.